Jeiderein weet wi gau de Tied lööpt. In een Johr is all de nächste Gemeinderotswohl. De Bundesdagswohl is denn auck. Steiht meist jeden Dag wat in de Zeidung, wer wat warden schall un will. Bürgermeister, Gemeinderot, Landrot, Bundesdagsavgeortnede un wat nich alles, schall wählt warden un dorför schallst du dien Stimmen hergeben.

Bi eenige von uns Dörpspolitiker un nich blots bi de, spukt dat bestimmt auck schon in’n Koop rüm, opp he een gooden Platz op de List krigt un in’n Gemeinderot kummt. Dor givt dat welge, de meent blots se weet wat good is för uns Minschen un weet wat dat Richtige is. Wat se öber dorbi vogeht, givt ganz veele de disse Meenung nich deelt. Wat richtig oder vokiehrt is, keen weet dat? Givt Politiker, auck hier opp’n Dörp, de hault Stuur an jümmer Idee fast un markt dorbi nich, dat se mit’n Kopp gegen ‘ne Wand loopt, weil se dat dör de Parteibrill seeht, auck hier in Nöttensdörp, öber auck in jeidet annere Dörp. Dor givt dat in jeiden Rot welge von un de markt gor nich, dat de Zug all lang avführt is, weil se de vokerte Brill op hebt.

Ik hev auck mien Meenung un segg dat auck. Wat de Annern dor von hault, is jümmer Sook. Se könnt sick doröber jo mol een’n Koop moken, wenn se wöllt.

Nu will ik nich rümquarken. Is god dat sik Lüüd opstell’n loot. Wenn se denn wählt sünd un entscheeden mött, is dat offmols gor nich so eenfach. Is dat richdig wat dor beschlooten warden schall oder is dat better den’n Vorschlag avtolehnen.

„Rech tomoken jeidermann, is eene Kunst de keener kann!“
Ik hev sülbens lang nauch in’n Rot sehten. Ik weet wo von ik hier snak un schriev. Off genaug hev ik tohüren kregen: „Wat hebt jie dor denn all wedder beschlotten, dat haarn jie ok anners moken kunnt.“ De so’n Schnak lauslott, sünd meistens Lüüd, de gor nich to Wohl goh’n sünd, weil se glövt, de in’n Rot mokt doch wat se wöllt.

Dorüm Lüüd, segg ik jau nu all, een ganzet Johr vörher, goht wähl’n, denn wenn du keene Stimm avgivts, kummt viellicht eener ran, denn du nich wullt hest. Un denn is dor nix meehr an tomoken, wenn de nich so avstimmt wie du di dat vörstellt hest.

Bit dorhin allns Goode!
Helmut Dammann